ମାଟିର ସ୍ୱାସ୍ଥ୍ୟ ଓ ଜୈବିକ ଚାଷର ପ୍ରଶଂସା କରି ଚିଠି ଲେଖିଲେ ଚାଷୀ
ସମ୍ବଲପୁର ଲୋକସଭା ଅନ୍ତର୍ଗତ ଦେବଗଡ଼ ଜିଲ୍ଲାର ତିଲେଇବଣି ବ୍ଲକ ଢୋଲପଡ଼ା ପଞ୍ଚାୟତ ର ଚାଷୀମାନେ ଶ୍ୟାମଳ ସୁବର୍ଣ୍ଣ ଆଗ୍ରୋ ଦ୍ୱାରା ଆରମ୍ଭ କରାଯାଇଥିବା “ଆମ ମାଟି ଆମ ପରିଚୟ” ପ୍ରୟାସ ପ୍ରତି ମାନ୍ୟବର ମନ୍ତ୍ରୀ ସୂର୍ଯ୍ୟବଂଶୀ ସୂରଜଙ୍କ ସହଯୋଗ ଏବଂ ସମର୍ଥନ ପାଇଁ ପୋଷ୍ଟକାର୍ଡରେ ଆଶୀର୍ବାଦ ଏବଂ କୃତଜ୍ଞତା ଜଣାଇଛନ୍ତି। ଏହି ପ୍ରୟାସ ଜୈବିକ କୃଷି ପଦ୍ଧତି ମାଧ୍ୟମରେ ମାଟି ସ୍ୱାସ୍ଥ୍ୟ ବଜାୟ ରଖିବା ଏବଂ ପୁନରୁଦ୍ଧାର କରିବା ଉପରେ ଗୁରୁତ୍ୱାରୋପ କରୁଛି। ପ୍ରକାଶଥାଉକି ଗତ ଡିସେମ୍ବର ୫ ମୃତ୍ତିକା ଦିବସ ଦିନ ଶ୍ୟାମଳ ସୁବର୍ଣ୍ଣ ଆଗ୍ରୋ ତରଫରୁ ମାଟିର ସ୍ୱାସ୍ଥ୍ୟ ଓ ଏହାର ସଂରକ୍ଷଣ କୁ ନେଇ ଆମ ମାଟି ଆମ ପରିଚୟ କାର୍ଯ୍ୟକ୍ରମକୁ ମାନ୍ୟବର ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କ ଦ୍ଵାରା ଆରମ୍ଭ କରାଯାଇଥିଲା ।
ଚାଷୀମାନେ ପ୍ରକାଶ କରିଛନ୍ତି ଯେ ମାଟି କେବଳ ଏକ ଉତ୍ପାଦନ ସମ୍ବଳ ନୁହେଁ ବରଂ ସେମାନଙ୍କର ପରିଚୟ ଏବଂ ଜୀବନରେଖା। ବର୍ଷ ବର୍ଷ ଧରି, ଅତ୍ୟଧିକ ରାସାୟନିକ ସାର ଓ କୀଟନାଶକ ଯୋଗୁଁ ମୃତ୍ତିକାର ଉର୍ବରତା ହ୍ରାସ ପାଇବା ଉଭୟ ପରିବେଶ ଓ ଆମ ସ୍ବାସ୍ଥ୍ୟ ପାଇଁ ଚିନ୍ତାଜନକ ବିଷୟ। “ଆମ
ମାଟି ଆମ ପରିଚୟ” ପଦକ୍ଷେପ ମାଧ୍ୟମରେ, ମୃତ୍ତିକାର ମାନ ବଢ଼ିବା ସହ, ଜୈବ-ସାର ଏବଂ ସ୍ଥାୟୀ କୃଷି ପଦ୍ଧତିର ଗୁରୁତ୍ୱ ବିଷୟରେ ଚାଷୀମାନଙ୍କ ମଧ୍ୟରେ ସଚେତନତା ସୃଷ୍ଟି କରାଯାଇଛି।
ମହିଳା ଚାଷୀ ଶ୍ରୀମତୀ ତିଲୋତ୍ତମା ଅଡାବରଙ୍କ ଅନୁଯାୟୀ, ଏହି ପଦକ୍ଷେପ ତିଲେଇବଣି ବ୍ଲକର ଚାଷୀମାନଙ୍କ ମଧ୍ୟରେ ନୂତନ ଆତ୍ମବିଶ୍ୱାସ ଆଣିଛି। ଅନେକ ଚାଷୀ ଜୈବିକ ଏବଂ ପ୍ରାକୃତିକ କୃଷି କୌଶଳ ଗ୍ରହଣ କରିବା ଆରମ୍ଭ କରିଛନ୍ତି, ଯାହା ଫଳରେ ମାଟି ଗଠନରେ ଉନ୍ନତି, ଆର୍ଦ୍ରତା ବୃଦ୍ଧି ଏବଂ ଚାଷ ଖର୍ଚ୍ଚ ହ୍ରାସ ପାଇଛି। ଏହି ଆନ୍ଦୋଳନ ଚାଷୀ ସମ୍ପ୍ରଦାୟର ସ୍ଥାୟୀ କୃଷି ପ୍ରତି ସାମୂହିକ ମନୋଭାବକୁ ମଧ୍ୟ ମଜବୁତ କରିଛି।
ଶ୍ୟାମଳ ସୁବର୍ଣ୍ଣ ଆଗ୍ରୋ ଦ୍ୱାରା “ଆମ ମାଟି ଆମ ପରିଚୟ” ପଦକ୍ଷେପ ଧୀରେ ଧୀରେ ଏକ ତୃଣମୂଳସ୍ତରୀୟ ଆନ୍ଦୋଳନ ଭାବରେ ଉଭା ହେଉଛି ଯାହାର ଲକ୍ଷ୍ୟ ଚାଷୀମାନଙ୍କୁ ସେମାନଙ୍କ ମାଟି ସହିତ ପୁନଃ ସଂଯୋଗ କରିବା, ଜୈବିକ କୃଷିକୁ ପ୍ରୋତ୍ସାହିତ କରିବା ଏବଂ ପରିବେଶଗତ ସ୍ଥାୟୀତ୍ୱ ସୁନିଶ୍ଚିତ କରିବା ବୋଲି ଏହାର ଫାଉଣ୍ଡର ଡି ଶୁଭମ୍ କହିଛନ୍ତି ।