ଅନୁସୂଚିତ ଜନଜାତି (ଏସଟି) ସମ୍ପ୍ରଦାୟର ଲୋକଙ୍କ ବିରୋଧରେ ବିଚାରାଧୀନ କ୍ଷୁଦ୍ର ଅପରାଧ ମାମଲା ପ୍ରତ୍ୟାହାର କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏଥିସହ ଆସନ୍ତା ଲୋକସଭା ଓ ବିଧାନସଭା ନିର୍ବାଚନ ପୂର୍ବରୁ ଆଦିବାସୀଙ୍କୁ ରିଲିଫ ପ୍ରଦାନ କରିବାକୁ ଓଡ଼ିଶା ସରକାର ନିଷ୍ପତ୍ତି ନେଇଛନ୍ତି।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସିଏମଓ) ଏକ ସରକାରୀ ବିବୃତ୍ତିରେ କହିଛି ଯେ କ୍ଷୁଦ୍ର ମାମଲା ପ୍ରତ୍ୟାହାର କରିବା ଦ୍ୱାରା କୋର୍ଟ ଏବଂ ନ୍ୟାୟିକ ବ୍ୟବସ୍ଥା ଉପରେ ଭାର କମିଯିବ।
ଏଠାରେ ଧ୍ୟାନ ଦେବା ପ୍ରଯୁଜ୍ୟ ଯେ ଗତଥର ହୋଇଥିବା ଜନଗଣନା ଅନୁଯାୟୀ ଆଦିବାସୀ ସମ୍ପ୍ରଦାୟ ରାଜ୍ୟର ଜନସଂଖ୍ୟାର ପ୍ରାୟ ୨୩ ପ୍ରତିଶତ ଅଟନ୍ତି। ଗୃହ, ଏକ୍ସାଇଜ୍ ଓ ଜଙ୍ଗଲ ଏବଂ ପରିବେଶ ବିଭାଗ ମୁଖ୍ୟମନ୍ତ୍ରୀ ଏ ବାବଦରେ ନିର୍ଦ୍ଦେଶ ଦେବା ପରେ ଆଦିବାସୀ ପୁରୁଷ ଓ ମହିଳାଙ୍କ ବିରୋଧରେ ପଞ୍ଜୀକୃତ ହୋଇଥିବା କ୍ଷୁଦ୍ର ମାମଲାର ସମୀକ୍ଷା କରିଥିଲେ।ପୁଙ୍ଖାନୁପୁଙ୍ଖ ସମୀକ୍ଷା ପରେ ସରକାର ଏପରି ୪୮,୦୧୮ଟି ମାମଲା ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି ଯେଉଁଥିରେ ଆଦିବାସୀମାନେ ବିଚାରର ସମ୍ମୁଖୀନ ହେଉଛନ୍ତି।