ମିଶନ ଶକ୍ତି ଓ ଓଡ଼ିଶା ମିଲେଟ୍ସ ମିଶନ ପକ୍ଷରୁ ‘ ମିଲେଟ ଶକ୍ତି କାଫେ’ ଉଦଘାଟିତ

ମିଲେଟର ସ୍ୱାସ୍ଥ୍ୟ ଉପକାରିତା ବିଷୟରେ ସଚେତନତା ସୃଷ୍ଟି କରିବା ତଥା ସ୍ୱାସ୍ଥ୍ୟ ସଚେତନ ନାଗରିକଙ୍କ ମଧ୍ୟରେ ସେମାନଙ୍କର ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ମିଶନ ଶକ୍ତିର ଓଡିଶା ମିଲେଟ ମିଶନ ଏବଂ ମହିଳା ସ୍ୱୟଂ ସହାୟକ ଗୋଷ୍ଠୀ ଅନେକ ମିଲେଟ ଶକ୍ତି କାଫେ ଖୋଲିଛନ୍ତି। ମିଶନ ଶକ୍ତି ଓ ଓଡ଼ିଶା ମିଲେଟ୍ସ ମିଶନର ମିଳିତ ଉଦ୍ୟମରେ ଭୁବନେଶ୍ୱର କଳିଙ୍ଗନଗରସ୍ଥିତ ଆନନ୍ଦ ବନଠାରେ ‘ମିଲେଟ୍ ଶକ୍ତି କାଫେ’ ଉଦଘାଟିତ ହୋଇଯାଇଛି। ଓଡ଼ିଶାର ପୁଷ୍ଟିକର ଖାଦ୍ୟ ମିଲେଟକୁ ସହରାଞ୍ଚଳବାସୀଙ୍କ ଖାଦ୍ୟଥାଳିରେ ସାମିଲ କରିବା ସହ ମିଲେଟ୍ ର ପ୍ରଚାର ପ୍ରସାର ଉଦ୍ଦେଶ୍ୟରେ ଏହି କାଫେ ଖୋଲାଯାଇଛି।

ଏଥିରେ ରାଜ୍ୟ ସରକାରଙ୍କ ମୁଖ୍ୟ ଶାସନ ସଚିବ ଶ୍ରୀଯୁକ୍ତ ପ୍ରଦୀପ କୁମାର ଜେନା ମୁଖ୍ୟ ଅତିଥିଭାବେ ଯୋଗ ଦେଇ କାଫେର ଉଦଘାଟନ କରିଛନ୍ତି। ଏହି କାଫେ, ଯାହା ସ୍ଵୟଂ ସହାୟକ ଗୋଷ୍ଠୀ ଦ୍ୱାରା ପରିଚାଳିତ, ମିଲେଟ୍ ବିକ୍ରୟ ବ୍ୟତୀତ, ମିଲେଟ୍ ସହିତ ପ୍ରସ୍ତୁତ ବ୍ୟଞ୍ଜନ ମଧ୍ୟ ପ୍ରଦାନ କରିବ। ଏହି କାଫେର ପରିଚାଳନା ଦାୟିତ୍ଵ ଅନ୍ନପୂର୍ଣ୍ଣା ସ୍ଵୟଂ ସହାୟକ ଗୋଷ୍ଠୀର ମହିଳାମାନଙ୍କୁ ଦିଆଯାଇଛି। ମିଲେଟ ଶକ୍ତି କାଫେ ମହିଳା ସ୍ବୟଂ ସହାୟକ ଗୋଷ୍ଠୀ ଦ୍ଵାରା ଏକ କୁଇକ୍ ସର୍ଭିସ୍ ରେଷ୍ଟୁରାଣ୍ଟ ଭାବେ ପରିଚିତ ହେବ।