ରାଜ୍ୟରେ ଅନେକ ଅଞ୍ଚଳ ଅଛି ଯେଉଁଠି ଜଳସେଚନର ସୁବିଧା ଉପଲବ୍ଧ ନାହିଁ। ସେହି ଅଞ୍ଚଳରେ ଅଧିକାଂଶ ଲୋକ ଚାଷ ଉପରେ ନିର୍ଭର କରୁଥିଲେ ମଧ୍ୟ ପାଣି ପାଇଁ ଅସୁବିଧାରେ ସମ୍ମୁଖୀନ ହେଉଛନ୍ତି, ଯାହାକି ଆଜିର ଦିନରେ ବହୁ ବଡ଼ ସମସ୍ୟା ହୋଇଛି। ସେହିପରି କିଛି ଅଞ୍ଚଳରେ ବନ୍ୟା ନିୟନ୍ତ୍ରଣ ମଧ୍ୟ କରାଯାଇପାରୁନାହିଁ, ଯାହାଦ୍ବାରା ସ୍ଥାନୀୟ ଲୋକମାନେ ବନ୍ୟା ସମୟରେ ନାହିଁ ନଥିବା ଅସୁବିଧାରେ ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ଦିନକୁ ଦିନ ଚାଷର ମାତ୍ରା ବଢ଼ିବାରେ ଲାଗିଛି, ତେଣୁ ରାଜ୍ୟରେ ଜଳସେଚନର ସମସ୍ୟା ସମାଧାନ ହେବା ନିତାନ୍ତ ଜରୁରୀ।
ତେଣୁ ରାଜ୍ୟରେ ଜଳସେଚନ ଓ ବନ୍ୟା ନିୟନ୍ତ୍ରଣକୁ ପ୍ରାଥମିକତା ଦେଇ ମାନ୍ୟବର ରାଜ୍ୟ ସରକାର ରାଜ୍ୟ ବଜେଟ୍ ୨୦୨୫-୨୬ ରେ ଜଳସେଚନ ଓ ବନ୍ୟା ନିୟନ୍ତ୍ରଣ ସହ ଜଳ କ୍ଷେତ୍ର ଭିତ୍ତିଭୂମିର ବିକାଶ ପାଇଁ ସ୍ୱତନ୍ତ୍ର ବ୍ୟୟ ବରାଦ କରିଛନ୍ତି। ସବୁ କ୍ଷେତ୍ରରେ ପାଣି ପହଞ୍ଚାଇବାକୁ ଦୃଷ୍ଟି ଦେଇ ରାଜ୍ୟ ସରକାର ତ୍ୱରିତ ଜଳସେଚନ ପାଇଁ ୧୭୮୬ କୋଟି ଟଙ୍କା ବ୍ୟୟ ବରାଦ ଘୋଷଣା କରିଛନ୍ତି। ଏଥିସହ ଜଳ କ୍ଷେତ୍ର ଭିତ୍ତିଭୂମି ବିକାଶ ପାଇଁ ୧୩୧୫ କୋଟି ଏବଂ ଇନସ୍ତ୍ରିମ୍ ଷ୍ଟୋରେଜ ପାଇଁ ୮୮୦ କୋଟି ଟଙ୍କା ବ୍ୟୟ ବରାଦ ଘୋଷଣା କରିଛନ୍ତି। ସରକାରଙ୍କ ଏହି ନିଷ୍ପତ୍ତି ବଳରେ ଅନେକ ଚାଷୀ ଏବଂ ସାଧାରଣ ଲୋକ ଉପକୃତ ହୋଇପାରିବେ ବୋଲି ଆଶା କରାଯାଉଛି।
ଉପସ୍ଥାପନା – ଦିବ୍ୟାଭାରତୀ ନାୟକ