ରାଜ୍ୟରେ ଥିବା କେନ୍ଦୁ ପତ୍ର ତୋଳାଳୀ ମାନଙ୍କୁ ରାଜ୍ୟ ସରକାରଙ୍କ ପକ୍ଷରୁ ବଡ଼ ଭେଟି ଘୋଷଣା କରାଯାଇଛି। ଏହି ଭେଟି ଅନୁଯାୟୀ ୫୦ କୋଟି ଟଙ୍କା ମଞ୍ଜୁରୀ କରିଛି ଜଙ୍ଗଲ ଓ ପରିବେଶ ବିଭାଗ। ଏହାଦ୍ଵାରା ରାଜ୍ୟର ୨୨ ଜିଲ୍ଲାରେ ଥିବା ୯ ଲକ୍ଷରୁ ଅଧିକ କେନ୍ଦୁ ପତ୍ର ତୋଳାଳୀ ଉପକୃତ ହେବେ ବୋଲି ଆଶା କରାଯାଉଛି। ଓଡ଼ିଶାର କେନ୍ଦୁ ପତ୍ର ବିକାଶ ବୋର୍ଡ ଏହି ବାଣିଜ୍ୟ ବଳକାରୁ କେନ୍ଦୁ ପତ୍ର ହିତାଧିକାରୀମାନଙ୍କୁ ବିଭିନ୍ନ କଲ୍ୟାଣକାରୀ ପଦକ୍ଷେପ ପ୍ରଦାନ କରୁଛି। ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ବିଭାଗର ଆର୍ଥିକ ବର୍ଷ ୨୦୨୫-୨୬ ପାଇଁ ‘ମୁଖ୍ୟମନ୍ତ୍ରୀ କେନ୍ଦୁ ପତ୍ର କଲ୍ୟାଣ ପାଣ୍ଠି’ର ଆର୍ଥିକ ଖର୍ଚ୍ଚ କମିଟି ଅନୁମୋଦନ ପାଇଁ ପ୍ରସ୍ତାବକୁ ନଜରରେ ରଖି ୫୦ କୋଟି ଟଙ୍କା ଅନୁମୋଦନ କରାଯାଇଛି।
ସରକାରଙ୍କ ପ୍ରତିଶ୍ରୁତି ଅନୁଯାୟୀ ୨୦୨୫ ଫସଲ ବର୍ଷ ପାଇଁ ସ୍ଥିର ହୋଇଥିବା ମାନଦଣ୍ଡ ଅନୁଯାୟୀ, ଖର୍ଚ୍ଚ ଆକଳନ ୫୦ କୋଟି ଟଙ୍କା କରାଯାଇଛି। କେନ୍ଦୁ ପତ୍ର ବିକାଶ ବୋର୍ଡରେ ଉପଲବ୍ଧ ବାଣିଜ୍ୟ ବଳକା ପରିମାଣରୁ କେନ୍ଦୁ ପତ୍ର ଶ୍ରମିକମାନଙ୍କୁ ପ୍ରୋତ୍ସାହନ ଏବଂ ଅନ୍ୟାନ୍ୟ ସୁବିଧା ଯୋଗାଇ ଦିଆଯିବ। ବକେୟା ପରିମାଣ ୨୦୨୪ ଫସଲ ବର୍ଷ ପାଇଁ ଉପଲବ୍ଧ ବାଣିଜ୍ୟ ବଳକାରୁ ପୂରଣ କରାଯିବ। ସମଗ୍ର ମାଲକାନାଗିରି, ନବରଙ୍ଗପୁର ଜିଲ୍ଲା ଏବଂ କଳାହାଣ୍ଡି ଜିଲ୍ଲାର ୧୯ଟି ଗ୍ରାମରେ କରାଯାଇଥିବା କେନ୍ଦୁ ପତ୍ର ବାଣିଜ୍ୟର ନିୟନ୍ତ୍ରଣ ମୁକ୍ତିକରଣକୁ ଅନ୍ୟ ୫ ରୁ ୬ ଟି ଜିଲ୍ଲାକୁ ବିସ୍ତାର କରାଯିବା ଉଚିତ ବୋଲି ରାଜ୍ୟ ସରକାର ମତବ୍ୟକ୍ତ କରିଛନ୍ତି।
ଉପସ୍ଥାପନା – ଦିବ୍ୟାଭାରତୀ ନାୟକ